Шэрагам мерапрыемстваў адгукнуліся раённыя клубныя і школьныя ўстановы на міжведамасную прафілактычную акцыю “Мы супраць алкаголю”. Першымі, да прыкладу, было наладжана каля 20 культурна-масавых мерапрыемстваў розных форм. У іх ліку круглы стол “Залежнасць — смерць і рэальнасць” (Глушанскі СДК), пазнаваўчая праграма “Піць — здароўю шкодзіць” (Міхалёўскі СДК), размоўная гадзіна “Наступствы алкагалізму” (Цялушскі СДК), размова “Падлеткавы асяродак і алкагалізм” (Варатынскі СДК).

Акрамя таго на стэндах клубных устаноў па прапагандзе здаровага ладу жыцця абнаўляецца інфармацыя ў тым ліку па прафілактыцы алкагалізму — лістоўкі, буклеты, плакаты.

Падчас акцыі ў раённых установах адукацыі праведзены тэматычныя мерапрыемствы (размовы, лекцыі, класныя і інфармацыйныя гадзіны, конкурсы, віктарыны, “круглыя сталы”, спартыўныя спаборніцтвы і інш.), накіраваныя на фарміраванне прававой культуры навучэнцаў, засваенне правілаў паводзін у грамадскіх месцах, на прафілактыку п’янства, наркаманіі, ужывання псіхатропных рэчываў, на прывіццё дзецям духоўных і маральных каштоўнасцяў. У прыватнасці, для 10-класнікаў Бортнікаўскага ВПК “Ясляў-сада-сярэдняй школы” наладжана класная гадзіна “Несумяшчальнасць здароўя і шкодных звычак”, з удзелам вучняў старэйшых класаў праведзена дзелавая гульня “Жыць годна!”, прайшлі спаборніцтвы па міні-футболе і турнір па шашках.

У Брожскай СШ арганізавана выстава літаратуры ў бібліятэцы на тэму: “Здароўе людзей у небяспецы. Алкаголь наступае”. У Каменскай СШ — гульня-віктарына “Міфы і рэальнасць” па прафілактыцы алкагольнай залежнасці для вучняў 8-9 класаў, конкурс малюнкаў “Мы — за здаровы лад жыцця”. Актыўна падхапілі акцыю ў Ленінскім ВПК “Дз/сад-СШ” — правялі кансультацыі для бацькоў па тэме “Уздзеянне п’янства на псіхіку дзяцей”, у 6-ты школьны дзень наведалі з дзецьмі аэраклуб у в. Сычкава, пазнаёміліся з прафесіяналамі парашутнага спорту. У Осаўскім ВПК “Дз/сад-БШ”, разам з іншым, правялі конкурс малюнкаў “Мы за здаровы лад жыцця”, турнір па шашках “Спорт супраць шкодных звычак”. Не застаўся ў баку Цялушскі ВПК “Дз/сад-СШ”. Там прайшло тэматычнае мерапрыемства з удзелам загадчыцы ўчастковай бальніцы В.Ф. Гацко, флэш-моб “Моладзь выбірае здаровы лад жыцця”.

У Туголіцкай СШ распаўсюдзілі інфармацыйныя буклеты “Аб шко­дзе алкаголю”, правялі тэматычны відэалекторый, круглы стол “Быць здаровым — гэта модна”. У Туркоўскай — дыспут “Бездань, у якую трэба зазірнуць”, інфарм­-дайджэст “Шкодныя звычкі і іх наступствы”. Хімоўскія школьнікі разам з настаўнікамі праглядзелі і абмеркавалі відэаролікі “Цана жыцця”, правялі круглы стол і конкурс малюнкаў па тэме. У Міхалёўскім ВПК “Дз/сад-СШ” наладзілі прагляд відэаролікаў, накіраваных на фарміраванне здаровага ладу жыцця, правялі спартыўнае мнагабор’е.

І гэта далёка не ўвесь пералік мерапрыемстваў, якія ў межах акцыі наладзілі ў раённых клубных установах і школах. Хочацца спадзявацца, што пабачанае, пачутае і абмеркаванае дзеці прынялі да ўвагі і сваё далейшае жыццё будуць будаваць па прынцыпу “Я супраць алкаголю”.

Раённая акцыя “Мы супраць алкаголю” праводзіцца ў адпаведнасці з комплексам мерапрыемстваў па прафілактыцы безнагляднасці і правапарушэнняў сярод непаўналетніх на 2020-2022 г. г. Яе мэта — павышэнне эфектыўнасці мерапрыемстваў, накіраваных на прафілактыку спажывання алкагольных, слабаалкагольных напояў і піва непаўналетнімі, выхаванне асноў здаровага ладу жыцця. Каардынатарам акцыі з’яўляецца камісія па справах непаўналетніх райвыканкама. Яна праводзіцца ва ўзаемадзеянні з зацікаўленымі службамі, ведамствамі, грамадскімі арганізацыямі: РАУС, БГП №2, Бабруйскім наркалагічным дыспансерам, аддзелам ідэалагічнай работы, культуры і па справах моладзі райвыканкама, РК ГА “БРСМ”, раённым цэнтрам сацабслугоўвання насельніцтва.

Алена КАРПЕНКА.