На Бабруйшчыне аб`яўлены агляд-конкурс на лепшага гаспадара сярод інвалідаў “Мы можам усё”. Праводзіцца ён з 20 чэрвеня па 25 жніўня бягучага года па ініцыятыве прэзідыума раённай арганізацыі Беларускага таварыства інвалідаў. Людзі з абмежаванымі магчымасцямі паспрачаюцца за званні лепшага жывёлавода, садавода, пчалавода, кветкавода і гароднінавода, а таксама ў намінацыі “Лепшы падворак”. Асобна будзе вызначана лепшае па даступнасці для інвалідаў асяроддзе, на званне якога могуць прэтэндаваць установы аховы здароўя, культуры, адукацыі, прадпрыемствы гандлю і бытавога абслугоўвання.

Падвесці вынікі, назваць пераможцаў конкурсу і ўзнагародзіць іх заклікана журы на чале са старшынёй праўлення Магілёўскай абласной арганізацыі інвалідаў Сяргеем Кузьміным. У саставе аглядавай камісіі таксама намеснік кіраўніка райарганізацыі Мікалай Самонаў, рэдактар галіновай газеты “Вместе” Жана Канопліч, яе калега з “Трыбуны працы” Алена Бегуновіч, дырэктар Бабруйскага мясакамбіната Андрэй Ісайчанка, уласны карэспандэнт газеты “Рэспубліка” Аляксандр Казак. Для пераможцаў агляду-конкурсу “Мы можам усё” прадугледжаны ўзнагароды: дыпломы і грашовыя прэміі, а для ўсіх яго ўдзельнікаў — каштоўныя падарункі. Каб паўдзельнічаць у прэстыжным спаборніцтве, ад людзей з абмежаванымі магчымасцямі ці ўстаноў і прадпрыемстваў патрабуецца толькі падаць заяўку ў пярвічную арганізацыю інвалідаў або на адрас прэзідыума раённай арганізацыі.
Чытачы заўважылі, што сёння Мікалай Самонаў названы намеснікам яе кіраўніка. Так, пасля бурных дэбатаў на тым жа пасяджэнні, што зацвердзіла палажэнне аб правядзенні агляду-конкурсу, ад пасады старшыні райарганізацыі інвалідаў ён быў вызвалены — у адпаведнасці з напісанай заявай. Справа ў тым, што воін-“афганец”, вельмі няўрымслівы і прынцыповы ў адстойванні правоў і інтарэсаў пакрыўджаных лёсам людзей, Мікалай Іванавіч на працягу двух дзясяткаў гадоў узначальваў раённую арганізацыю, вывеў яе ў лік перадавых у вобласці і краіне, вельмі мала адпачываў. Вось і пагоршыўся стан здароўя, які і прымусіў напісаць заяву.
Актывісты грамадскага аб`яднання, не зважаючы на абставіны, не хацелі адпускаць шэфа. Шмат добрых слоў выказала на адрас Мікалая Іванавіча, напрыклад, старшыня пярвічнай арганізацыі з Осава Валянціна Голуб. І толькі аргументацыя са спасылкай на добра падабраную кандыдатуру новага старшыні, якая прагучала з вуснаў абласнога куратара Сяргея Кузьміна і самога Мікалая Самонава, зрабіла калег-таварышаў больш лагоднымі. У пацверджанне разумення сітуацыі яны дружна абралі сваім лідарам Людмілу Чарнабаб, якая ў сваю чаргу папрасіла быць у яе намеснікам былога старшыню. І гэта аднагалосна зацвердзілі актывісты, бо разумеюць, што ў спалучэнні вопыту і маладой энергіі — поспех.

Аляксандр Бяляеў.
Фота аўтара.