Рабочую нараду ў гэты панядзелак старшыня райвыканкама Міхаіл Шалкоўскі пачаў з абмеркавання пытанняў сельскай гаспадаркі. Аб справах у гэтай галіне далажыў першы намеснік старшыні, начальнік райсельгасхарчу Валерый Сяргейчык, які, у прыватнасці, адзначыў, што няўбранымі на раніцу панядзелка засталіся кукуруза на зерне і нязначная колькасць цукровых буракоў. Падыходзіць да заканчэння падняцце зябліва. Сярод гаспадарак, якія  праявілі актыўнасць у гэтым відзе работ, філіялы «Варатынь» РУП «БЗ ТДіА», «Харчавік-Агра» ААТ «Чырвоны харчавік», ААТ «Саўгас Кісялевічы», Бабруйскае ААТ «Аграмашсервіс» і БТАА  «Амега-Люкс». Хужэй справы з ворыўнымі работамі абстаяць у СВК «Стасеўка» і ТДА «Птушкафабрыка Вішнёўка». Што да нарыхтоўкі арганічных угнаенняў, то вывазкай апошніх на палі і ўнясеннем іх у глебу займаюцца літаральна ва ўсіх сельгасарганізацыях. Спыніўшыся ў дакладзе на сёлетняй ураджайнасці культур, Валерый Сяргейчык адзначыў, што клубняў бульбы з аднаго круга найбольш накапалі ў СВК “Гігант” — 506 ц, лідэрам па ўраджайнасці цукровых буракоў прызнаны СВК «Калгас імя А. Неўскага» — 562 ц/га. Тэхналогіі вырошчвання дадзеных культур у гэтых сельгасарганізацыях, па словах начальніка райсельгасхарчу, добра было б павучыцца тым, дзе ўраджайнасць значна ніжэйшая. 

Аб выніках работы раённых кірмашоў па продажы сельгаспрадукцыі ў мінулыя выхадныя дні давяла на планёрцы намеснік старшыні райвыканкама Тамара Рудая. Яна паведаміла, да таго ж, што Бабруйскаму райспажыўтаварыству і СВК «Гігант»”, якія прынялі ўдзел у рэспубліканскім сельгаскірмашы ў Мінску (у днях Магілёўскай вобласці), аб’яўлена Удзячнасць ад абласнога выканаўчага камітэта.

Аддзел эканомікі райвыканкама, як адзначыла Тамара Рудая, на мінулым тыдні займаўся ў тым ліку і маніторынгам гандлёвых кропак раёна. Усяго іх было праверана 49. У некаторых выяўлены прадукты з пратэрмінаваным тэрмінам рэалізацыі. У сувязі з гэтым  райспажыўтаварыству ўказана на неабходнасць правядзення тлумачальнай работы з гандлёвымі работнікамі па недапушчэнні падобных фактаў у далейшым.   

Не абыйшлі на планёрцы і пытанні, звязаныя з ацяпляльным перыядам, у прыватнасці, забяспечанасці насельніцтва дровамі. На гэты час, як паведаміў намеснік старшыні райвыканкама Ігар Кісель, у чарзе на іх набыццё ў пераважнай колькасці тыя з грамадзян, хто падаў заяўку на працягу кастрычніка.

Асобным пунктам на планёрцы вялося абмеркаванне стану злачыннасці на тэрыторыі раёна і ў асаблівасці крадзяжоў. Як паведаміў начальнік штаба Бабруйскага РАУС Васіль Арцёмаў, з 16-ці зарэгістраваных на мінулым тыдні злачынстваў 13 менавіта крадзяжы, сярод якіх — і дзяржаўнай уласнасці. Між тым, як было адзначана, рэйдавыя праверкі паказваюць, што ў асобных арганізацыях па-ранейшаму да пытанняў захавання маёмасці адносяцца не належным чынам. Паўздзейнічаць на сітуацыю, па словах кіраўніка раёна, можна толькі шляхам спагнання з асоб, адказных за арганізацыю аховы маёмасці, грашовых сродкаў у памеры страчанага. Што датычыцца крадзяжоў з уласных падворкаў, то тут, па словах старшыні райвыканкама, асноўную стаўку трэба рабіць на ўзмацненне прафілактычнай работы ўсімі зацікаўленымі службамі, у тым ліку і пасродкам СМІ.

Аб рабоце, якая праводзіцца па добраўпарадкаванні тэрыторыі, далажылі на планёрцы старшыня раённага Савета дэпутатаў Леанід Баркоўскі, галоўны санітарны ўрач раёна і г. Бабруйска Валянціна Парахневіч, намеснік начальніка гаррайінспекцыі прыродных рэсурсаў і аховы навакольнага асяроддзя Ігар Гайдучык. 

У завяршэнне планёркі старшыня райвыканкама Міхаіл Шалкоўскі прадставіў прысутным в.а. першага сакратара РК ГА “БРСМ” Івана Салаўя і пажадаў новаму лідэру раённай моладзі плённай працы на гэтай ніве.

Алена КАРПЕНКА.